1Ti 2 | BOJ | STEP | Ariya e anjam kobaquja bei endegsi mermit ni qusim daurye. Ni na Kristen tamo uŋgasari naŋgi minjroqnimqa naŋgi tamo kalil qa pailyoqnebe. Yim Qotei na naŋgi aqaryainjroqnqas. Od, ni na naŋgi minjroqnimqa naŋgi Qotei biŋiyoqnebe.

1 Timothy 2

Iga Qotei na tamo uŋgasari kalil naŋgi aqaryainjroqnqajqa deqa pailyoqnqom

1 Ariya e anjam kobaquja bei endegsi mermit ni qusim daurye. Ni na Kristen tamo uŋgasari naŋgi minjroqnimqa naŋgi tamo kalil qa pailyoqnebe. Yim Qotei na naŋgi aqaryainjroqnqas. Od, ni na naŋgi minjroqnimqa naŋgi Qotei biŋiyoqnebe. 2 Ni na Kristen tamo uŋgasari naŋgi minjroqnimqa naŋgi mandor kokba ti sawa taqato qaji tamo kalil naŋgi qa ti Qotei pailyoqnib a na naŋgi aqaryainjroqnqas. Yim deqa iga kalil are lawo sosim kumbra Qotei a areareteqnu qaji di dauryoqnqom. 3 Kristen tamo uŋgasari naŋgi degsib pailyoqnibqa Qotei agi iga eleŋej qaji a naŋgi qa tulaŋ areboleboleiyqas. Pailyo deqaji Qotei aqa ŋamgalaq di tulaŋ boledamu. 4 Qotei a na tamo uŋgasari kalil naŋgi oqajqa are qaleqnu. Yim naŋgi anjam bole poinjrqajqa deqa. 5 Iga qalie, Qotei a segi qujai Qotei bole. Kristus Yesus a segi qujai tamo uŋgasari naŋgi ti Qotei ti naŋgo ambleq di tigelesosiqa yeba waiyej unu. 6 Kristus a moiqajqa bati agi Qotei a nami bati yonaqa a bosiqa tamo uŋgasari kalil naŋgi oqa marsiqa aqa segi ŋambile uratosiq moiej. Aqa kumbra dena Qotei na iga endegsi osorgej, a na tamo uŋgasari kalil naŋgi oqajqa are qaleqnu. 7 Qotei a na e aqa anjam marsiy laqajqa deqa osiq e giltbej. Deqa e aqa anjam marqajqa wau ti. E bole mermonum. E gisaŋosai. E sawa bei bei qaji tamo uŋgasari naŋgi qa gilsiy Qotei aqa anjam minjroqnitqa naŋgi qusib Kristus qa naŋgo areqalo siŋgilatosib aqa anjam bole poinjrqajqa deqa osiqa e wau ebej.

8 Deqa ni na Kristen tamo qure qure kalilq di unub qaji naŋgi minjroqnimqa naŋgi baŋ soqtoqnsib pailyoqnebe. Naŋgi mati naŋgo segi ŋambile Qotei yekritosib aqa kumbra boleq di sosib minjiŋ ti ŋiriŋ ti uratosib kumbra bole dena naŋgi pailyoqnebe.

Uŋgasari naŋgi Qotei aqa anjam dauryosib wau bole bole yoqnqab di naŋgo wala bole

9 E na anjam bei dego ni mermqai. Ni na uŋgasari naŋgi minjrimqa naŋgi areqalo bole na gara jigoqnebe. Naŋgi diqoqnsib naŋgo gate baŋga walatoqnaib. Osib kolilei na ti wala bole na ti naŋgo jejamu maqtosib gara wala ti jigoqnaib. 10 Ni na uŋgasari naŋgi minjrimqa naŋgi Qotei aqa anjam dauryqa marsib wau bole bole yoqnebe. Di naŋgo wala bole agide. 11 Ni na uŋgasari naŋgi minjrimqa naŋgi naŋgo segi ñam aguq atoqnsib medabu getentosib Qotei aqa anjam quoqnebe. 12 E na uŋgasari naŋgi anjam palontqa saidnjreqnum. Deqa naŋgi tamo naŋgo gate saib. Naŋgi medabu getentosib anjam segi quoqnebe. 13 Ni que. Qotei a Adam namoqna gereiyosiqa ariya bunuqna a Iv gereiyej. 14 Satan a na Adam gisaŋ anjam bei minjosai. A na Iv gisaŋ anjam minjnaq qusiq dauryej. Osiq deqa a une atej. 15 Ariya ni na uŋgasari naŋgi minjrimqa naŋgi aŋgrotoqnsib aŋgro qa wauoqnebe. Naŋgi wau di yoqnsib gaigai Kristus qa naŋgo areqalo siŋgilatoqnsib naŋgo segi ŋambile a yekritosib aqa kumbra boleq di sosib qalaqalaiyo kumbra dauryosib kumbra bole bole yoqnebe. Yim deqa Qotei a na naŋgi oqas.